Tuesday, May 29, 2007

ആത്മ സൌഹൃദത്തിന്റെ സുഗന്ധം



ആത്മ സൌഹൃദത്തിന്റെ സുഗന്ധം



എന്റെ പ്രിയ ചങ്ങാതിക്ക്
എക്കാലത്തെയും എന്റെ ആത്മസുഹൃത്തിന്,

വേര്‍പാടിന്‍‌റ്റെ നീണ്‍‌ടകനവുകള്‍ക്കിടയില്‍ മറവിയുടെ മഹാമൌനങ്ങളിലേക്ക് ചേര്‍ത്തുവെച്ച സുഹൃത്തുക്കളുടെ പട്ടികയില്‍ ഞാനും പെട്ടുപോയൊ? ബന്ധങ്ങള്‍ക്കിടയില്‍ വിള്ളലും വിങ്ങലുമുണ്‍‌ടാക്കുന്ന വിരഹം നമുക്കിടയിലും അകലങ്ങളുണ്‍‌ടാക്കിയോ? എത്ര ഹൃദയാകര്‍ഷകമായിരുന്നു നമ്മുടെ ആ ചങ്ങാത്തം!
തങ്കവും വൈഢൂര്യവും പോലെ പ്രകാശിച്ചിരുന്ന ആ സ്നേഹം എന്നാണിനി തിരിച്ചുകിട്ടുക? ഒരിക്കലും തിരിച്ചുകിട്ടില്ലെന്നെനിക്കറിയാം. തിരക്കുപിടിച്ച ജീവിതയാത്രയില്‍ നമുക്കൊന്നും ബന്ധങ്ങള്‍ പുതുക്കാന്‍ പോലും സമയമില്ലാതായി, അല്ലേ?
ഇതൊന്നും നമ്മള്‍ പ്രതീക്ഷിച്ചിരുന്നില്ല. ഒരിക്കലും പിരിയരുതേ എന്നായിരുന്നു നമ്മുടെ പ്രാര്‍ഥന. പിരിയില്ലെന്ന് നമ്മള്‍ പ്രതീക്ഷിച്ചു, വിശ്വസിച്ചു.
പക്ഷേ...
അനിവാര്യമായ വിധിക്ക് നമ്മളും കീഴ്പ്പെട്ടു. എന്‍‌റ്റെ പ്രിയപ്പെട്ട ചങ്ങാതീ, ബന്ധങ്ങളെല്ലാം വേനല്‍മഴപോലെയാണ്. എപ്പോഴാണ് പെയ്തുവീഴുകയെന്നോ എപ്പോഴാണ് തിരിച്ചു പോവുക എന്നോ നിശ്ചയമില്ലാത്ത മഴത്തുള്ളികള്‍ പോലെ. അല്ലേ, നിനക്കും അങ്ങനെ തോന്നിയിട്ടില്ലേ?
ഓരോ രാവിലും ഓരോ പകലിലും തീരാത്ത ഓര്‍മ്മയായൊഴുകുന്നമാസ്മരികാനുഭവമായി, ഹൃദ്സ്പന്ദിക്കുന്ന സ്നേഹോഷ്മളമായ സുഖമുള്ള ഓര്‍മ്മയായ് നീ എനിക്കുണ്‍‌ടാവണമെന്ന് ഞാനെന്നും ആഗ്രഹിക്കുന്നു, മോഹിക്കുന്നു.
എന്‍‌റ്റെ സുഖങ്ങളില്‍ ഊഷ്മളമായ ശീതക്കാറ്റായ്, എന്‍‌റ്റെ ദുഃഖങ്ങളില്‍ സമാശ്വാസത്തിന്‍‌റ്റെ തണല്‍മുകിലായി നീയുണ്‍‌ടാവണം. സൌഹൃദങ്ങള്‍ക്ക് തിളക്കം നഷ്ടപ്പെട്ട ഇക്കാലത്ത് എന്‍‌റ്റെ ആഗ്രഹങ്ങള്‍ വെറും വിചാരങ്ങള്‍ മാത്രമാണെന്നെനിക്കറിയാം.
എന്നെ, ഈ ചങ്ങാതിയെ നീ മറവിയിലേക്ക് തള്ളിയോ? അങ്ങനെയാവരുതേ എന്ന് ഞാന്‍ ആഗ്രഹിക്കുന്നു. നിന്‍‌റ്റെ വിവരങ്ങള്‍ എന്നെ അറിയിക്കണം. ജീവിത്യാത്രയില്‍ വീണ്‍‌ടും‌ കാണാനും ഒന്നിച്ചു കഴിയാനും....
എല്ലാം പഴയതുപോലെ പങ്കുവെക്കാനും അവസരങ്ങളുണ്‍‌ടാകുമോ? ഉണ്‍‌ടാകാന്‍ നമുക്ക് ശ്രമിക്കാം, പ്രാര്‍ഥിക്കാം.




നിറഞ്ഞമനസ്സോടെ,
നിന്‍‌റ്റെ ആ പഴയ ചങ്ങാതി.





ഈ കത്ത് ഒരു പഴയ രീതിയാണ്. ബന്ധങ്ങളുടെ പുതിയ കമ്പോളനിലവാരമനുസരിച്ച് വളരെ പഴഞ്ചനാണിത്. ഭ്രാന്തമായൊരു മനസ്സിന്‍‌റ്റെ വൃഥാവിചാരങ്ങള്‍. ഹൃദയമലിഞ്ഞ ആത്മസൌഹൃദങ്ങള്‍ കാലഹരണം ചെയ്ത പുതിയ കാലത്ത് ഇത്തരം മൃദുവിചാരങ്ങളെല്ലാം എടുക്കാത്തനാണയങ്ങളാണ്. ചില്ലലമാരയിലിട്ട് സൂക്ഷിക്കാന്‍ മാത്രം കൊള്ളുന്ന പുരാതന മോഹങ്ങള്‍! ഫാസ്റ്റ്ഫുഡും ഇന്‍സ്റ്റന്റ് ലൈഫും ശീലമാക്കിയ നമ്മുടെ കാലത്ത് സൌഹൃദങ്ങളുടെ വേദനയോ ബന്ധങ്ങളുടെ രുചിയോ ആര്‍ക്കും പഥ്യമല്ല.
മനസ്സിലെ മൃദുമോഹങ്ങള്‍ നോട്ട്‌ബുക്കിന്‍‌റ്റെ നിറമില്ലാത്ത പേജിലേക്ക് ചേര്‍ത്തെഴുതി തുരുമ്പെടുത്ത തപാല്‍‌പെട്ടിയില്‍‌ സൂക്ഷിച്ച്, ആത്മബന്ധത്തിന് നിറം‌ കൂട്ടിയിരുന്ന ആ സുന്ദരകാലം‌ എത്ര രസമായിരുന്നു. കത്ത് കിട്ടിയോ, ഇല്ലേ എന്ന ആധിയോടെ, മറുപടിക്കായുള്ള നീണ്‍‌ട ഓര്‍‌ത്തിരുപ്പ്!! പോസ്റ്റുമാന്‍‌റ്റെ നീളന്‍കുട കാത്തിരുന്ന ദിനങ്ങള്‍‌!!!
ഒന്നും‌ പറഞ്ഞതില്ലെന്നുമെന്‍‌
കൈത്തലം‌
ഒന്നുപതുക്കെ പിടിച്ചമര്‍‌ത്തി-ക്ഷണം‌
നിന്നതല്ലാതെ,
മുഖം‌ തെല്ലുയര്‍‌ത്തിയെന്‍‌
കണ്‍‌കളിലേക്കൊന്ന്
നോക്കിയതല്ലാതെ,
കന്നിവെയിലില്‍‌ നീന്തിയെത്തുന്ന
കാറ്റുപോല്‍‌
ശീതോഷ്ണമാര്‍‌ന്ന നിന്‍‌
ദീര്‍‌ഘനിശ്വാസങ്ങള്‍‌
എന്നെ വലം‌ വെച്ചു പോയതല്ലാതെ
ഒന്നും‌ പറഞ്ഞതില്ലൊന്നും‌.
കാണ്‍‌മതെന്നിനിയെന്നു
ചോദിക്കാനുമാകാതെ
ഒന്നും‌ പറയാതെ, ഒന്നും‌ പറയാതെ...
സ്നേഹസൌഹൃദങ്ങളുടെ മണവും‌ നിറവും‌ തുളുമ്പുന്ന എന്‍‌ മോഹനന്‍‌റ്റെ ‘ഒരിക്കല്‍‌’ എന്ന നോവല്‍‌ ആരം‌ഭിക്കുന്നത് ഓ എന്‍‌ വി യുടെ ഈ വരികള്‍‌ ഉദ്ധരിച്ചാണ്. മൌനവാചാലതയുടെ ആന്തോളനമാണീ വരികള്‍‌. ചങ്ങാത്തത്തിനുമേല്‍‌ കരിമ്പടമായി വന്നുവീഴുന്ന വേര്‍‌പാടിന്‍‌ വേനലിനെ അത്രമേല്‍‌ അടയാളപ്പെടുത്തുന്നുണ്‍‌ട് ഈ വരികള്‍‌.
എന്‍ മോഹനന്‍‌റ്റെ ‘നുണ വെറും നുണ’ എന്ന ചെറുകഥ ഏറെ മനോഹരമാണ്. കുട്ടികളാകുമ്പോള്‍‌ അയല്‍‌ പക്കക്കാരായ ആണ്‍‌കുട്ടിക്കും‌ പെണ്‍‌കുട്ടിക്കും‌ ഊഞ്ഞാലാടി കളിക്കാമായിരുന്നു. മണ്ണുകൊണ്‍‌ട് ചോറും‌ കറിയും‌ വെച്ച് അച്ഛനും‌ അമ്മയുമാകാമായിരുന്നു. ഒന്നിച്ചു പഠിക്കാനും‌ ഒന്നിച്ചു കളിക്കാനും‌ കഴിയുമായിരുന്നു. വലുപ്പം‌ കൂടും‌തോറും‌ അവര്‍‌ക്കിടയില്‍‌ അറിയാതെ അകലവും‌ കൂടി. “എന്തിനാണുനമ്മള്‍‌ വലിയവരായത്?” എന്ന് ഒരുവേള കഥാകാരന്‍‌ ആ കൂട്ടുകാരിയോട് ചോദിക്കുന്നുണ്‍‌ട്.
ചെറിയ ചെറിയ വേദനകള്‍‌ നല്ല സൌഹൃദങ്ങളുടെ അടയാളമാണ്. പുതിയ തലമുറക്ക് ആവശ്യമില്ലാത്തത് ഈ വേദനയാണ്. എല്ലാം ആര്‍‌ഭാടം‌ നിറഞ്ഞ ആഘോഷമാക്കി മാറ്റാനാണ് അവര്‍‌ക്കു പ്രിയം‌. പിന്നെയെവിടെ വേദനയുണ്‍‌ടാക്കുന്ന ആ വിസ്മയബന്ധങ്ങള്‍‌?
അട്ടിയായി കൂട്ടിവെച്ച പുസ്തകങ്ങള്‍‌ക്കു നടുവില്‍‌ കണ്ണും‌ കാതും‌ കനപ്പിച്ചിരിക്കുന്ന പുതിയ വീടുകളിലെ മക്കള്‍‌ക്ക് സ്നേഹമെന്ന വാക്കുപോലും‌ പരിചയം‌ കാണില്ല. ബേബി ഫുഡ് നിറച്ച അവരുടെ മനസ്സില്‍‌ പരിചയങ്ങള്‍ക്ക് ഇടമുണ്‍‌ടാകണമെന്നില്ല, മണ്ണുതട്ടാത്ത അവരുടെ ശരീരത്തില്‍‌. കാറ്റും‌ വെളിച്ചവുമേല്‍‌ക്കാതെയുള്ള ജീവിതമാണ് അവര്‍‌ക്ക്‌ പരിചയം‌. അതാണവരുടെ പുസ്തകവും‌. മണ്ണിലും‌ ചെളിയിലും‌ ജീവിതം‌ പഠിച്ച്, മരക്കൊമ്പത്താടിയും മാഞ്‌ചാടിച്ചുവട്ടില്‍‌ ഓടിയും‌ മാവിന്‍‌ തോപ്പില്‍‌ മത്സരിച്ചു നടന്നും‌ ജീവിച്ചവര്‍‌ക്ക് മരണം‌ വരെ മങ്ങാത്ത ഓര്‍‌മ്മയായിരിക്കും‌ അവയൊക്കെ. ‘ഒരു കൊച്ചു കാറ്റേറ്റ് വീണ തേന്‍‌ മാമ്പഴം‌ ഒരുമിച്ചു പങ്കിട്ട കാലം‌ / ഒരുമിച്ച് പങ്കിട്ട ബാല്യകാലം’ എന്ന കവി വചനത്തില്‍‌ ആ പഴയ ഓര്‍‌മയാണ് പച്ചമാങ്ങപോലെ പുളിക്കുന്നത്.
കുട്ടിക്കാലത്തെ സൌഹൃദങ്ങളുടെ പ്രത്യേകത, സൌഹൃദത്തെക്കുറിച്ചോ സ്നേഹത്തെക്കുറിച്ചോ യാതൊന്നും‌ അറിയാതെയാണ് ആ സൌഹൃദങ്ങള്‍‌ രൂപപ്പെടുന്നതെന്നാണ്. വര്‍‌ഷങ്ങള്‍ക്കുശേഷമുള്ള ഓര്‍‌മയില്‍‌ അത് ആനന്ദം‌ നിറയ്ക്കുമെന്നുമാത്രം‌. എന്നാല്‍‌ കൌമാര-യൌവന കാലങ്ങളിലെ സൌഹൃദങ്ങളങ്ങിനെയല്ല. ജീവിതത്തെക്കുറിച്ചുള്ള ബോധ്യവും‌ ബന്ധങ്ങളെക്കുറിച്ചുള്ള ബോധവും‌ രൂപപ്പെട്ടുതുടങ്ങുന്ന കാലമായതിനാല്‍‌ അക്കാലത്ത് വന്നുകൂടുന്ന സൌഹൃദങ്ങള്‍‌ ഏറെക്കുറെയൊക്കെ ഗൌരവം‌ നിറഞ്ഞതായിത്തീരുന്നു. വേര്‍‌പാട്, താങ്ങാനാവാത്ത വിഷാദമായിത്തീരുന്നതും‌ ആ സൌഹൃദങ്ങള്‍‌ക്കു തന്നെയാണ്. പ്രണയം‌ ഈ അര്‍‌ഥത്തിലാണ് നാം‌ കാണേണ്‍‌ടത്. വ്യക്തിയെ അധര്‍‌മത്തിലേക്ക് നയിക്കുന്നതെല്ലാം‌ തിന്‍‌മയാണ്. അത്, ചെറിയ ഒരു വിചാരമായിരുന്നാലും‌‌, കാഴ്ചയായിരുന്നാലും‌, കേള്‍‌വിയായിരുന്നാലും‌, പ്രണയമായിരുന്നാലും‌.
ഹൃദയമലിഞ്ഞ ആത്മസൌഹൃദങ്ങളെ തിരിച്ചുപിടിക്കാന്‍‌ സാധിക്കുമോ നമുക്ക്? അങ്ങനെയെങ്കില്‍‌ മനസ്സില്‍‌ എന്നും‌ ആഘോഷമായിരിക്കും. ഓര്‍‌ക്കാനും‌ ഓമനിക്കാനും‌ കുറേ നല്ലമുഖങ്ങളുണ്‍‌ടാവുക എന്നത് വലിയ ഭാഗ്യമാണ്. ആ ഭാഗ്യം‌ നഷ്ടപ്പെട്ടുകൊണ്‍‌ടിരിക്കുന്നവരാണ് നമ്മള്‍‌. മനസ്സ് മനസ്സോട് ചേര്‍‌ത്ത് ഉള്‍‌പുളകമായി സ്പന്ദിക്കുന്ന സനാതന സൌഹൃദങ്ങള്‍‌ വീണ്‍‌ടെടുക്കാന്‍‌ നമുക്ക് സാധിക്കട്ടെ. തിരക്കുകള്‍ക്കിടയില്‍‌ ഒറ്റപ്പെട്ടുകൊണ്‍‌ടിരിക്കുന്ന നമ്മുടെ മനസ്സിന് കുളിരുകോരിയിടുന്ന മഞ്ഞുതുള്ളിയായ്, മഴക്കാലമായ്, മായാത്ത മനോഗതമായ്, സുഖശീതളമായ വസന്തകാലമായ് ആ സ്നേഹബന്ധങ്ങള്‍‌ നിറയും‌, തീര്‍‌ച്ച.
“കിയ സൈര്‍‌ ഹം‌നേ ഗുല്‍‌സാര്‍‌-ഏ ദിനിയാ
ഗുല്‍-ഏ-ദോസ്തീ മേ അജബ് രം‌ഗ്-ഓ-ബൂഹൈ”

ഈ ഭൂമിയിലെ മലര്‍‌വാടികളില്‍‌ കൂടി ഞാന്‍‌ ഒരുപാട് സഞ്ചരിച്ചിട്ടുണ്‍‌ട്. സൌഹൃദമാകുന്ന പുഷ്പത്തിന്‍‌റ്റെ നിറവും‌ സുഗന്ധവും‌ എത്ര അതുല്യം‌! (ഖാജാ മീര്‍‌ദര്‍‌ദ്)
Share:

Wednesday, May 23, 2007

മൂന്ന് കുറുങ്കവിതകള്‍

1. പ്രണയം
പ്രണയമായിരുന്നെനിക്ക്....
പറയാതെ....,
ഒരിക്കലും പറയാതെവെച്ച
ഒരു ചുവന്ന മറുക്,
ഒരുനാള്‍...
ഒരു പകലായ് പരിണമിക്കുംവരെ,
പ്രണയമായിരുന്നെനിക്കവളോട്...
അനിര്‍വ്വചനീയ പ്രണയം....!!




***************************************************




2. സഹയാത്രികന്‍
ഇനി ദൈവം സ്വന്തം നാട്ടില്‍
സായാഹ്നസവാരിക്കിറങ്ങുമെങ്കില്‍,
ഞാനായിരിക്കും സഹയാത്രികന്‍...
കഴിഞ്ഞ അവധിക്കാലമത്രയും
കുഞ്ഞുണ്ണിമാഷായിരുന്നിരിക്കണം
ദൈവത്തിനു കൂട്ടുനടന്നത്...!


***************************************************






3. ചിരി


അര്‍ദ്ധവാര്‍ഷിക പരീക്ഷാദിനം
എഴുത്താണിക്കടിയിലെ പല്ലടയാളം കണ്‍ട്,
പാതിചിരിച്ച വേലായുധന്‍മാഷ്
പല പരീക്ഷണങ്ങളും കഴിഞ്ഞ്
ചുടുചായക്ക് പണംതരുമ്പോള്‍...
പണ്‍ടത്തെ ചിരി മുഴുവനാക്കി...!!




***************************************************





Share:

Tuesday, May 22, 2007

തലേന്ന്...

തലേന്ന്...

ഒരു വേനല്‍ത്തലേന്ന് ആകാശത്തിന്നടിയില്‍
പിറന്നിടം കൈവിടാനാകാതെ,
കടിച്ചുതൂങ്ങിക്കിടന്നു ഒരു മഴക്കാലത്തിലെ
ഒടുവിലത്തെ മഴത്തുള്ളി...
അതു ഞാനെടുത്തു...
അതിനി എന്റെ ഹൃദയത്തിന്നടിയില്‍

ഒരു പുതുമഴയോളം തിളങ്ങിത്തൂങ്ങും...

ഒരു കാലവര്‍ഷത്തലേന്ന് കരിയോലപ്പഴുതിലൂടെ,
കരിപിടിച്ച അടുക്കളച്ചുവരില്‍ മായാന്‍ മടിച്ചു കിടന്നു.
ഒരു വേനലിലെ ഒടുവിലത്തെ വെയില്‍ത്തുള്ളി...
അതും ഞാനെടുത്തു...
അതെന്റെ ഹൃദയത്തിന്റെ ചാണകക്കോലായില്‍
ഇനിയൊരു വേനലോളം ചിമ്മിനിയാകും

ഒരു കലാപത്തലേന്ന് കടത്തിണ്ണയിലൊന്നില്‍
കനവുകവര്‍ന്നൊരമ്മയുടെ മുലനുകര്‍ന്നുകിടന്നു
കറുത്തുമെലിഞ്ഞ ഒരിന്ദ്രയത്തുള്ളി...
എനിക്കെടുക്കാന്‍ തോന്നിയില്ല...

അതിനിയെന്റെ ഹൃദയത്തിന്റെ കിടപ്പറയില്‍
ഒരു വലിയ നിലവിളിയായ്
എന്നുമെന്നെ കാത്തുകിടക്കും...
Share:

Tuesday, May 15, 2007

കനല്‍ പെയ്യുന്ന മരുഭൂമിയില്‍ നിന്ന്...

കനല്‍ പെയ്യുന്ന മരുഭൂമിയില്‍
നിന്ന്...




സുഹൃത്തുക്കളെ...

ആസന്നമായ ഒരു മടക്കയാത്രയുടെ വിമ്മിട്ടത്തിലും ബേജാറിലുമാണ് ഗള്‍ഫുകാരന്റെ മനസിപ്പോള്‍. തിമര്‍ത്ത് പെയ്യുന്നൊരു പെരുമഴക്കാലത്തില്‍ ഉള്ളും മനവ്വും തണുപ്പിക്കാന്‍ കഴിയാതെ, കാത്തിരിപ്പിന്റെ സഹാറയില്‍ അവനെത്ര ദൂരം താണ്ടാനാവും?

ഒരായുസ്സിന്റെ നീളം മുഴുവനും പ്രവാസകാലത്തില്‍ ഉണ്ടുറങ്ങിയിട്ടും, ഒരു കൂരയോ, മെച്ചപ്പെട്ട ഒരു ജീവിതമോ കെട്ടിപ്പടുക്കാന്‍ കഴിയാത്ത ഹതഭാഗ്യരാണ് കണക്കെടുപ്പ് കഴിഞ്ഞാലേറെയും...

എന്നെങ്കിലും കണ്ടെത്തുമെന്ന് വൃഥാ മോഹിക്കുന്ന ഒരു മരുപ്പച്ചയുടെ തണലും, തെളിനീരുമന്വേഷിച്ച്, മരുക്കാറ്റടിക്കുന്ന ജീവിതത്തിലൂടെ കടന്നു പോകുമ്പോള്‍, ഗള്‍ഫുകാരനോര്‍ക്കാന്‍, ഓമനിക്കാന്‍ ഗൃഹാതുരത്വത്തിന്റെ മൃദുസ്പര്‍ശമില്ല.

കുടുംബത്തിന്റെ മണ്‍ചെരാതായി മാറുവാനുള്ള പരക്കം പാച്ചിലിന്നിടയില്‍ സ്നിഗ്ധ വികാരങ്ങള്‍ക്കും, പൂവിട്ടു തളിര്‍ക്കുന്ന ഓര്‍മക്കീറുകള്‍ക്കുമെന്ത് പ്രസക്തി?

അവസ്ഥകള്‍, മുമ്പത്തെപ്പോലെ ആയാസകരമല്ല. തൊഴില്‍ സാധ്യതകളും, സ്പോണ്‍സറുടെ കീഴിലല്ലാതെ എവിടെയും തൊഴിലെടുക്കാമെന്ന അവസ്ഥയും മാറിക്കഴിഞ്ഞു. വര്‍ഷം തോറും യൂണിവേഴ്സിറ്റികളില്‍ നിന്നുമിറങ്ങുന്ന സ്വദേശീ യൂവതീ-യുവാക്കള്‍ക്ക് ജോലി നല്‍കേണ്ട കടമയും ബാധ്യതയും അതാത് ഗവണ്മെന്റുകള്‍ക്കുണ്ട്. തൊഴിലവസരങ്ങള്‍ കുറഞ്ഞുവരുന്നത് അനാരോഗ്യകരമായ മത്സരങ്ങള്‍ക്ക് ആക്കം കൂട്ടുകയും ചെയ്യുന്നു.
ഘട്ടം ഘട്ടമായി നടപ്പിലാക്കിക്കൊണ്ടിരിക്കുന്ന സ്വദേശീവത്കരണം, പിടിചുനില്‍ക്കാനുള്ള അവസാന കച്ചിത്തുരുമ്പും, പ്രവാസികള്‍ക്ക് നഷ്ടമാക്കുന്നു. ആയിരക്കണക്കിനു കുടുംബങ്ങള്‍ക്ക് അടുപ്പെരിയാനുള്ള എണ്ണയാകുന്ന, അറേബ്യന്‍ മണ്ണിന്റെ കനിവും, ദയയും നിലച്ചുപോയാല്‍ ഉണ്ടാകുന്ന സാമൂഹിക പ്രത്യാകാതങ്ങള്‍ ഏറെയാണ്. ഗള്‍ഫ് മണ്ണിലെ കുടിയൊഴിപ്പിക്കല്‍, പ്രവാസീകുടുംബങ്ങളില്‍ ആശങ്കകളുടെ കരിനിഴല്‍ വീഴ്ത്താന്‍ തുടങ്ങിയിട്ട് ഏറെയായി. ഗള്‍ഫ് എന്നത്, നമ്മുടെ നാടിന്റെയും, ഗവണ്മെന്റിന്റെയും ഒഴിച്ചുകൂടാനാവാത്ത സാമ്പത്തിക സ്സ്രോതസ്സാണ്.
സുഹൃത്തുക്കളെ,
അമ്പിളിമാഞ്ഞ ആകാശം, ഇരുട്ട് പുതച്ചുതുടങ്ങുകയാണ്... അറബിക്കടല്‍ കടന്ന് തിരിച്ചുപോവുന്ന ഓരോ ആകാശക്കപ്പലുകളിലും, കൈപ്പിടി നഷ്ടപ്പെട്ട് കണ്ണീരോടെ മടങ്ങുന്ന ഒരുപാട് പേരുണ്ട്. കുടുംബത്തെയോര്‍ത്ത് വ്യാകുലപ്പെടുന്ന അവരുടെ മനസ്സിന്റെ തിരതള്ളിച്ച, വിമാനത്തിന്നിരമ്പലില്‍ മുങ്ങിപ്പോയേക്കാം. എന്നാല്‍... വിസ ക്യാന്‍സല്‍ ചെയ്ത് തിരിച്ചുവരുന്ന ഭര്‍ത്താവിനെ, പിതാവിനെ, മകനെ, മകളെ സ്വീകരിക്കാന്‍ വിമാനത്താവളത്തിലെത്തുന്ന സ്വന്തക്കാരുടെ മുഖത്തെ മ്ളാനത ആര്‍ക്കാണ്‍ മായ്ച്ചുകളയാനാവുക..? പെയ്യാന്‍ പാകത്തില്‍ മൂടിക്കെട്ടിക്കിടക്കുന്ന അവരുടെ മുഖങ്ങളിലെ മേഘക്കീറുകള്‍..., അശാന്തി നിറഞ്ഞൊരു ഭാവിയെയാണ്‌ സൂചിപ്പിക്കുന്നത്.
ഗള്‍ഫിന്റെ പോരിശയെക്കുറിച്ച് അത്തറുമണക്കുന്ന പാട്ടുകള്‍ അലയടിപ്പിക്കുന്ന കാലം കഴിഞ്ഞുപോയിരിക്കുന്നു. ഗള്‍ഫ് ഭാര്യയുടെ വിരഹത്തിന്‍ വിതുമ്പലും തോതുമളക്കുന്ന കത്തുപാട്ടുകളുടെ തരംഗവും ഓര്‍മകളിലേക്ക് മാഞ്ഞുപോയിരിക്കുന്നു. ഗള്‍ഫ് ഭര്‍ത്താക്കന്‍മാര്‍ക്ക് കച്ചവടമൂല്യമുണ്ടായിരുന്ന നാളുകളും ഇനി ഓര്‍മയില്‍ മാത്രം. യഥാര്‍ഥ്യത്തിന്റെ പുതിയ കാലത്തില്‍ പ്രവാസിയും, പ്രവാസവും ഒരു കഥകളും വിരചിക്കുന്നില്ല. കത്തിത്തീരുന്ന മെഴുകുതിരികളായി, കുടുംബത്തിനുവേണ്ടി ജീവിക്കാന്‍ വിധിക്കപ്പെട്ടവനായി ത്യാഗത്തിന്റെ മൂര്‍ത്തീഭാവമായി ചിത്രീകരിച്ചിരുന്ന, പഴയ പരിവേഷവും ഗള്‍ഫുകാരനിന്നില്ല.
ഗള്‍ഫുകാരന്റെ ത്യാഗം, നിയതമായ ഒരു നിയോഗമായി മാറുകയാണ്. ആര്‍ക്കും, ആരോടും പ്രതിബദ്ധതയില്ലാത്ത പുതിയകാലത്തില്‍, പാര്‍ശ്വവത്കരിക്കപ്പെടുന്ന പ്രവാസികള്‍ ഒരു വെറും ചോദ്യം പോലും ഉണര്‍ത്തുന്നുമില്ല. ദിനരാത്രങ്ങളിലൂടെ കടന്നു പോകുന്ന വെറുമൊരു ചാക്രിക ചലനം മാത്രമായൊതുങ്ങുന്ന പ്രവാസിയുടെ ജീവിതവും, എവിടെയും വിഷയീഭവിക്കപ്പെടുന്നില്ല.
ജി സി സി രാഷ്ട്രങ്ങളൊക്കെയും തന്നെ ധ്രുത ഗതിയിലുള്ള സ്വദേശീവല്കരണത്തിന്റെ പാതയിലാണ്. വിവിധ തൊഴില്‍ മേഖലകള്‍ പരീക്ഷണാര്‍ഥം ഇപ്പോള്‍ തന്നെ ദേശസാല്‍ക്കരിക്കപെട്ടും കഴിഞ്ഞു. ഇത്തരം മേഖലകളില്‍ നിന്നും കൂട്ടത്തോടെ കുടിയൊഴിപ്പിക്കപ്പെടുന്നവര്‍ വഴിയാധാരമാവുകയും ചെയ്യുന്നു. ഇന്നല്ലെങ്കില്‍ നാളെ ഓരോ വിദേശിയുടെയും നിലനില്പ് അവതാളത്തിലാവുമെന്ന ബോധ്യം ഓരോരുത്തര്‍ക്കുമുണ്ട്.
ഉള്ളിലെ ഈ ഭയാശങ്കകള്‍ ഉണര്‍ത്തുന്ന കറുത്തപാടയോട് കൂടിയാണ്‌ പ്രവാസികളുടെ ഓരോ ദിനരാത്രങ്ങളും കടന്നു പോവുന്നതും.
35 (മുപ്പത്തിയന്‍ച്) ലക്ഷത്തോളം ജനങ്ങളില്‍ 26 (ഇരുപത്തിയാറ്‌) ലക്ഷത്തോളം പ്രവാസികളെ ദയാവായ്പ്പോടെ സ്വീകരിച്ച ഈ യു. എ. ഇ. യിലെ വിവിധ ഭാഗങ്ങളിലെ മലയാളീ പ്രവാസികളുടെ ജീവിതം നോക്കിക്കാണുകയാണ്, ഞാന്‍ ... പ്രവാസികളും പ്രവാസവും ഏത് മേഖലയിലും ഒരേചിന്തയും പ്രശ്നങ്ങളുമാണുണര്‍ത്തുന്നത് എന്നതിനാല്‍ അറേബ്യന്‍ ഭൂഖണ്ഡത്തിലെ ഏതു രാജ്യത്തിലെ പ്രവാസികളുമായും ഇവരെ ബന്ധിപ്പിക്കാവുന്നതാണ്.
ഗള്‍ഫ് രാജ്യങ്ങള്‍ ആധുനിക രാഷ്ട്ര നിര്‍മിതിയുടെ മകുടോദാഹരണങ്ങളാണ്. വികസന സ്വപ്നങ്ങളെ താലോലിക്കുകയും ദീര്‍ഘദൃഷ്ടിയോടെ ഉണര്‍ന്നുപ്രവര്‍ത്തിക്കുകയും ചെയ്യുന്ന ഭരണകര്‍ത്താക്കള്‍. നാടിന്റെ വളര്‍ച്ചയോടൊപ്പം പൌരന്മാരുടെ അവകാശ സംരക്ഷണവും, അതീവ ജാഗ്രതയോടെ നോക്കിക്കാണുന്നതില്‍ ബദ്ധശ്രദ്ധരാണവര്‍. അതുകൊണ്ടാകാം, തൊഴില്‍ മേഖലയിലെ അസന്തുലിതാവസ്ഥ പരിഹരിക്കാനുള്ള സത്വര നടപടികള്‍ കൈക്കൊള്ളുന്നതും.
മാറുന്ന ലോകത്തോടൊപ്പം സഞ്ചരിക്കുന്നവര്‍ക്ക് മാത്രമെ, അവസരങ്ങളുള്ളൂ. ഐ ടി യുഗത്തിന്റെ സാധ്യതകള്‍ പ്രയോജനപ്പെടുത്താനുള്ള മാത്സര്യം അതുകോണ്ടുതന്നെയാണ്.
ഗള്‍ഫുകാരന്റെ മാനസിക പിരിമുറുക്കം, തൊഴില്‍ മേഖലകളിലെ അനിശ്ചിതത്വത്തിന്റെ പരിണിത ഫലമാണ്.
നഷ്ടപ്പെട്ടവര്‍, നഷ്ടപ്പെടുത്തിയവര്‍, തുഴഞ്ഞ് തുഴഞ്ഞ് ശക്തി ക്ഷയിച്ചവര്‍, കരിവേപ്പിലപോലെ വലിച്ചെറിയപ്പെട്ടവര്‍, അപ്പൂപ്പന്‍ താടിപോലെ നിയത്രണമില്ലാതെ പറന്നു പൊങ്ങിയവര്‍....
കണ്ടുമുട്ടിയവരില്‍, അങ്ങിനെ ഒരുപാട് മുഖങ്ങള്‍....
അവരുടെ കണ്ണുകളില്‍ കിനിഞ്ഞ വികാരം പങ്കുവെക്കുമ്പോള്‍, പല ചോദ്യങ്ങളുടെയും വ്യര്‍ഥതയറിയുന്നു....
വര്‍ഷങ്ങളായി, മരുഭൂമിയില്‍ പ്രവാസ ജീവിതം നയിച്ചുവരുന്ന ഒരാള്‍, കാലക്രമേണ ഒരൊട്ടകമായി പരിണമിക്കുന്ന ഒരു കാര്‍ട്ടൂണ്‍ ചിത്രം, ഈയിടെ കാണാനിടയായി. അതിലെ തമാശയുടെ അളവില്‍ രസിച്ചിരിക്കെ, മുമ്പിലെ കണ്ണാടിയില്‍ വെറുതെയൊന്ന് പാളിനോക്കി....
വലിയ ചെവികളും, നീളന്‍ മുഖവുമായി ഞാനും ഒരൊട്ടകമായി മാറിക്കൊണ്ടിരിക്കുന്നു!!
പ്രവാസിയായി കഴിഞ്ഞ വര്‍ഷങ്ങളുടെ, കണക്കെടുപ്പ് കഴിഞ്ഞ് അന്തിച്ചു നില്‍ക്കെ; കണ്ണാടി, ഒരു തമാശ കണ്ടിട്ടെന്നപോലെ ആര്‍ത്താര്‍ത്തു ചിരിക്കാന്‍ തുടങ്ങി...
----------------------------തുടരാന്‍ സാധ്യത!
Share:

Latest News

Categories

2014 AbduRabbu Amen Android Article Aruvikkara Cyclone Gonu Demonetisation Demonetization Education Eid Mubarak facebook gaza Gonu Google Hussain Madavoor IUML KairaliTV Kanthapuram kavitha Kerala KK KSRTC LDF Madhyamam makkalam malayalam Malayali Peringode Mangalam TV mazha mazhathulli MediaOne Meelad Milad Minister MM Akbar Mobile Modi Mujahid Muslim League N D F OsamaBinLadin Peace School poem Political Politics QLS rain Ramadan Saudi SDPI sea Shabab Shukkoor Swalahi Sister Jesmi Tips & Tricks UAE varthamanam VT Balram അനാചാരം അനുഭവം അബ്ദുല്‍ഹമീദ് അഭിമുഖം അയുക്തീ അരുവിക്കര അവധി ആമേന്‍ ആശംസകള്‍ ഇസ്രാഈല്‍ ഇസ്‌റാഈല്‍ ഈദ് മുബാറക് ഉസാമ എൻ ഡി എഫ് എൽഡി‌എഫ് എസ് ഡി പി ഐ ഏകാന്തത ഐനു നുഹ ഒസാമ ബിൻ ലാദിൻ ഓര്‍മ ഓര്‍മക്കുറിപ്പ് കമല സുരയ്യ കവിത കള്ള ആത്മീയത കാത്തിരിപ്പ് കാന്തപുരം കാരക്കുന്ന് കാര്‍ട്ടൂണ്‍ കിനാലൂര്‍ കെ കെ മുഹമ്മദ് സുല്ലമി കൈരളി ഖുര്‍‌ആന്‍ ലേണിംഗ് സ്കൂ‍ള്‍ ഖുര്‍‌ആന്‍ വിജ്ഞാന പരീക്ഷ ഗസ്സ ഗാസ ചതി ചന്ദ്രിക ചാവേര്‍ ചെറിയമുണ്ടം ജമാ‌അത്തെ ഇസ്‌ലാമി ജയ് ഹിന്ദ് ടിവി ടിവി ഡാര്‍വിനിസം തീവ്രവാദം ദാറുല്‍ഇസ്‌ലാം ദാറുല്‍കുഫ്രര്‍ ദാറുല്‍ഹര്‍ബ്‌ ദൈവം നരഹത്യ നാ‍ട്ടിലേക്ക് നോട്ട് അസാധു നോട്ട് നിരോധനം പഠനം പലവക പാഠപുസ്തകം പിണറായി വിജയൻ പുതുമഴ പുസ്തകം പോലീസ് പൌരോഹിത്യം പ്രതികരണം ഫലസ്തീന്‍ ഫലസ്ത്വീന്‍ ഫലസ്ഥീന്‍ ഫെയ്സ്ബുക്ക് ബഷീർ ബിജെപി ബിദ്‌അത്ത് ബേനസീര്‍ ഭീകരാക്രമണം മംഗളം മതം മത്സ്യം മദനി മലയാളി മഴ മാധവിക്കുട്ടി മാധ്യമം മാംസം മീഡിയ വൺ മീലാദ് മുട്ട മുംബൈ മുസ്‌ലിം ലീഗ് മോദി യാത്ര യുക്തിവാദം രമേശ് ചെന്നിത്തല രാഷ്ട്രീയം ലേഖനം ലോക വൃദ്ധ ദിനം വഖഫ് ബോര്‍ഡ് വർഗീയത വര്‍ത്തമാനം വർത്തമാനം വര്‍ത്തമാനം ആഴ്‌ചപ്പതിപ്പ് വഹീദുദ്ദീന്‍ ഖാന്‍ വായന വാര്‍ത്ത വിമർശം വ്യക്തി ശബാബ് വാരിക ശശീന്ദ്രൻ ശിഹാബ് തങ്ങള്‍ ശുക്കൂർ സ്വലാഹി സാമൂഹികം സിപി‌ഐ‌എം സിസ്റ്റര്‍ ജെസ്‌മി സൗദി സ്വാതന്ത്ര്യദിനാശംസ ഹുസൈന്‍ മടവൂര്‍ ഹൂറി റമദാന്‍

Ordered List

Definition List