ദ്വീപിൽ ഇനിയെങ്ങനെ നേരം വെളുക്കും?!

ദ്വീപിൽ ഇനിയെങ്ങനെ നേരം വെളുക്കും?!

പണ്ടുപണ്ടൊരു കൊച്ചു ദ്വീപിൽ കുറച്ചാളുകൾ താമസിച്ചിരുന്നു. അതിലൊരു വീട്ടിൽ ഒരു ചേട്ടൻ ഒറ്റയ്ക്ക് താമസിച്ചിരുന്നു. അധികം വീടുകളോ ആളുകളോ ഇല്ലാതിരുന്നിട്ടും അവർ സുഖമായി ജീവിച്ചു പോന്നു. ഒറ്റയ്ക്ക് താമസിക്കുന്ന ആ ചേട്ടനെ കൊണ്ട് ദ്വീപ് നിവാസികൾ വല്ലാതെ പ്രയാസപ്പെട്ടു. ഒടുവിൽ അവർ എല്ലാരും ഒത്തുകൂടി ഒരു തീരുമാനമെടുത്തു. അയാളെ ദ്വീപിൽ നിന്നും പുറത്താക്കുക. അങ്ങിനെ ആ ചേട്ടനെ ദ്വീപിൽ നിന്നും പുറത്താക്കുന്ന സമയത്ത് ആ ചേട്ടൻ ചോദിച്ച ചോദ്യമാണ് മുകളിൽ കൊടുത്തത്. ദ്വീപിൽ ഇനിയെങ്ങനെ നേരം വെളുക്കും എന്നെനിക്കൊന്നു കാണണം എന്ന്.

അഞ്ചാറുമാസങ്ങൾക്ക് ശേഷം ദ്വീപിലെ കുട്ടികൾ മറ്റെവിടെയോ വെച്ച് ആ ചേട്ടനെ കണ്ടുമുട്ടി. അപ്പോൾ ചേട്ടൻ ചോദിച്ചു:  'ഇപ്പോൾ എങ്ങനെ നിങ്ങടെ ദ്വീപിൽ നേരം വെളുക്കുന്നൊക്കെ ഉണ്ടോ ടാ?'
'ഉണ്ടല്ലോ! പഴയപോലെ തന്നെ അവിടെ നേരം വെളുക്കുന്നുണ്ട്.'

ഇത് കേട്ട് വിശ്വാസം വരാതെ ആ ചേട്ടൻ സ്വയം ചോദിച്ചത്രെ; 'ങേ?! ദ്വീപിൽ ആകെയുണ്ടായിരുന്ന പൂവൻകോഴിയെ ഞാൻ കൊണ്ടു വന്നല്ലോ, പിന്നെങ്ങനെ....?!'

ആ സാധു വിചാരിച്ചിരുന്നത് പൂവൻ കോഴിയുടെ കൂവൽ കേട്ടാണ് നേരം വെളുക്കുന്നത് എന്നായിരുന്നു. ഏതാണ്ട് അതുപോലെ തന്നെയാണ് നമ്മുടെ നാട്ടിലെ ഭരണം കയ്യാളുന്നവരുടെ അവസ്ഥ. ക്രമസമാധാനവും സാമ്പത്തികരംഗവും രാജ്യസുരക്ഷയുമൊക്കെ തവിടുപൊടിയാകുമ്പോഴും ഇതുപോലെ ഒടുക്കത്തെ ആത്മവിശ്വാസമാണ് ഈ പഹയന്മാർക്കും.

-മലയാളി പെരിങ്ങോട്